Romans 7

Loloya N Owa

1Fye ta kpelon omi azaje aye-yei, a Yahudiyi dna n Kristi sanu n oza lafi owa to n iko yi shan sun lo n wo aban?

2Ma ga ɓesisi; sanu nyikoza pamula owa n lawo pa gyi nwo ɓa har ewyi n wa fi ncei. Ama n wa fi owa to n ikoyi shan sun lo n wo tukwon. Mula owa ta shan wo knizun. 3Nsayi, woɓa mi wa se enu do, n wa ye kwo ɓei ɓa zhin nukwoyi owo ɓa wo n wye-wyei, ama, kwo to zhin nukwoyi nu woi la fin.

4Ofye ɓa, ofye tukwo da kwo nu ɓei zhin owa a Yahudiyi nya, ama, fya ku fi n Kristi yi n zundu, tunda fye ku fi, fye to ye shan owa se lon, kohin to n ikoyi shan sun lo n fye tukwon. Fye a jeze ɓe wye-wyei sa n Kristi a laka n vingwo fyei ku ze aza woi-woyi Nsaiye, fye ku se oza nwa laka la n efi n nabai fya zhin a tnu-tnu a manayi, a tnu-tnu amanayi Shekwoyi nya. 5Sanu, n oza kwo-kwoyi ɓei zhin woi ye lo tnu-tnu n fye mi aɓo nukwoyi zhin pwa ɓei zhin ɓai wo fye, fyei zhin oɓo n Shekwoyi a gna nge fye to zhin, fyei zhin aɓo anukwoyi a tnu-tnu efi nya. 6Ama nsaiye fye to gye fye anuwan n na Yahudiyi owa yin n ɓa knunu yin. Ntuge fyeɓo ku fi, fyei fi n ɓa bauta zhin, nsaiye, fye ɓa zhin Shekwoyi bauta to ge dna n zokwo kwo-kwoyi, fyei shi awyidna bwan, ama n zokwo woyi, (nfye abugbai vinya n fye awye-wyei vinya.)

7To, mi wu nu nge Shekwoyi owa zhin nukwoi nu? Awo, owa to zhin nyanukwoyi nun, owa nu ɓei wumi omi laifi, mi to ɓei ɓa kpe laifi ye n kwo dna n mi bugban, aɓo pwa wo nukwoi n ɓa ɓe fi n mi bugba min, to owai a gna n ge, “To wo aɓo nukwoi shakpe n ho bugba min.” 8Ama, laifi zhin a pma n owa yi, kwoi wumi nge shakpe deye pya to bmiyam, kwoi ku anya pwawo nukwoi kala n mi-mi. To owa ɓei lo n na ɓa zun gnana, to ɓenukwoyi zhin yi yelon.

9Cenu ɓei zhin to ma gye mi anuwan sanu n mi to ɓei kpe nya ye n owa yen. Ama sa n mi ɓei kpe gaiciya ye, ma kpe ge mi la owa zungna, mi la ze laifi da n kunce n fiyi. 10Nmi aba, manayi n kwo ɓei kunce kwa wu mi wye-wyei zokwo, kwo nu a zhin a gami efi lada nu. 11Laifi ɓei dna mi kwoce kwoi la owa manayi Shekwoyi nya kwoi zhin apma n kwoi, kwoi zemi oza n wo kunce n ofi yi. 12Ama owa n kwohin tukwo kwo zhin nya manayi nu n bmiya.

13Ama kwo ɓa ze nwuna? Owa nu to bwi min? Kwo ɓa ze manayi n wuna? Awo, laifi nu. Nya kasa–nu ɓei zhin apma n nyai n kwo bmiya, kwa zun mi kni ntu lonu fye gye, kwo zhin nya kasa nya nukwoyi. Ntu ge kwo zhin apma n Shekwoyi owa manayi kwa nu kwo ɓeye.

14Ntu lonu owa bmiya, wahala to! Lo n kwoi nun, ama n mihin nu, ntuge mi kundna gni nu nbauta zhin, n laifi yi n ze omi tukwoda.

Oɓo Nkwo Gna Mi Gna-Gna

15Mi ta kpe, omihin tukwo ɓe ganyi lon, ntuge, mi ye ma zhin oɓo n kwo bmiya, ama mi ta min. Mi zhin oɓo n mi to cei pman, enya n mi ta yen. 16Mi kpelo sarai enya n mi zhin nyi kwo to bmiya lon, emi nubo zhin wumi nge, mila ye n owa yei n mi zungna nyi. 17Ama mi ta mi ma bma mihin zhin, ntuge mi to ye zhin celon, laifi nu n kwo dna n mi, n du mi kala nyi, kwoi zhin mi mi-i zhin aɓo a nukwoyi.

18Mi kpelo nge mi la bwo n mi nai kwo-kwoyi, kwo n miya pmi lo n kni bwai nuʼa, mi ta mi ma zhin mihin ma zhin ɓe manan, mi n cei pmalo ama mita min. 19Sa n mi cei pma ma zhin ɓe manayi, mi ta min, n ma zhin atna to ma zhin ɓenukwoyin, ma zhin kwonu. 20Ama ngye mi zhin ɓo lo n mi to n cei pman, kwo wunu ge laifi ye n mii shilo n kwo akun.

21Kwa wunu ge owa ye zhin tnutnu lo n mi, sanu n mi cei pma ma zhin oɓo n kwo bmiya ma ze ma zhin nukwoyi nu. 22Miye ma zhin Shekwoyi ɓeye, shi emi zawoi-woi ncei pma. 23– 24Ama nyalo n dna n mi mi, n mi oza kninya kwoi sun kun lo nmi-i, kwoi gyi nasara n mi-i, kwoi zemi laifi bara n kwo ye dnalo n mi. Nmi mi, mi cei pma ma ze bara Shekwoyi ɓeye zhin yi. Ama ma gye mi ye zhin laifi bauta.

25Omi za woi-woi gnami ge mi zhin ɓe manayi, ama oza kwo-kwoyi nkwo dna nmi mi n cei pmalo kwa zhin ɓenukwoyi. Ewuyi emi, mi la ze sun-sun nya. Nyi kadonu ɓa gni mi n nai efi nya yeʼa? Ma gode n Shekwoyi, Yesu Kristi eyi Dagayi n lami gni woi la mi loya.